أخبار الجمهور نبض الشعب وقلب الحقيقة
بقلم:مريم عمر
إنتِ مش محتاجة تكوني واثقة إنك هتنجحي عشان تبدأي… إنتِ محتاجة تبدأي عشان تعرفي إنك تقدري
ماتقفيش قدام فرصة حلوة وتفضلي تسألي نفسك: هو أنا هعرف؟ طب لو فشلت؟ طب لو طلعت مش شاطرة؟
محدش بيبدأ وهو عارف كل حاجة.
” مش يمكن لما اجرب اطلع بعرف”
كل بنت ناجحة دلوقتي كانت في يوم واقفة قدام حاجة جديدة ومش عارفة هتقدر عليها ولا لأ. الفرق إن واحدة خافت ورجعت، وواحدة قالت: هجرب يمكن اعرف
جربي الشغل اللي نفسك فيه.
جربي تتعلمي حاجة جديدة.
جربي تبدأي مشروعك.
جربي تدخلي مجال كنتِ فاكرة إنه مش ليكي.
جربي تاخدي مسؤولية أكبر.
جربي حتى لو إنتِ لسه مش واثقة من نفسك.
لأنك ممكن تدخلي التجربة وإنتِ فاكرة إنك مش شاطرة، وتخرجي منها وأنتِ عارفة إن عندك قدرات مكنتيش تعرفي إنها موجودة أصلًا.
ومتخافيش من الغلط.
الغلط مش شهادة إنك فشلتي، الغلط جزء من إنك تتعلمي. ومش كل حاجة هتظبط من أول مرة، ومش كل محاولة هتوصلك للنتيجة اللي نفسك فيها، وده طبيعي.
المهم إنك ماتحكميش على نفسك قبل ما تجربي.
ممكن تكوني طول عمرك بتقولي: أنا معرفش.
طب جربي.
ممكن تقولي: أنا مش شاطرة.
طب اتعلمي.
ممكن تقولي: أنا خايفة.
خافي… واعمليها برضه.
لأن الشجاعة مش إنك ماتخافيش، الشجاعة إنك ماتخليش خوفك يقرر مستقبلك.
ومع كل مرة هتجربي فيها، هتكتشفي حاجة جديدة عن نفسك هتلاقي نفسك بتفهمي أسرع وبتتعاملي أحسن وبتثقي في قراراتك أكتر.
وفي يوم هتفتكري أول مرة بدأتي فيها، وهتضحكي على خوفك القديم.
وهتعرفي إنك مكنتيش محتاجة حد يقولك إنك تقدري…
إنتِ كنتِ محتاجة بس تدي لنفسك فرصة.
فلو في حاجة نفسك تعمليها، ابدئي.
ماتستنيش تكوني مثالية.
ماتستنيش تبقي جاهزة.
ماتستنيش حد يطمنك.
جربي… لأنك ممكن تكتشفي إنك بتعرفي.
وتحاولي… لأنك ممكن تكتشفي إنك بتنجحي.
وتبدأي… لأنك ممكن تكتشفي نسخة من نفسك أقوى بكتير من اللي كنتِ تعرفيها.
وأهم حاجة…
ماتخليش الخوف من إنك ماتقدريش يمنعك من اكتشاف إنك فعلًا تقدري.