أخبار الجمهور نبض الشعب وقلب الحقيقة
بقلم:اموره ثابت
من واحنا صغيرين اتعلمنا إن كلمة “لا” عيب، وإن لازم نوافق عشان الناس تحبنا. نكبر ونتعود نجي على نفسنا عشان نرضي الكل.
توافقي تروحي مكان مش عايزاه، توافقي تسمعي كلام بيوجعك وتسكتي، توافقي تشيلي شغل فوق طاقتك عشان ما حدش يزعل. وفي الآخر انتي اللي بتتعبي.
تقولي “لا” مش معناها إنك قاسية ولا أنانية. معناها إنك عارفة قيمة وقتك وطاقتك ومشاعرك. معناها إنك بتحترمي نفسك قبل ما تستني حد يحترمك.
لما تقولي لا لحاجة مش شبهك، انتي بتقولي أيوه لنفسك. بتقولي أيوه لراحتك، لسلامك النفسي، لحلمك اللي مأجلاه عشان ترضي غيرك.
مش كل الناس هتتقبل كلمة “لا” منك في الأول، وناس هتزعل. بس اللي بيحبك بجد هيحترم حدودك، واللي يزعل عشان بتحافظي على نفسك، زعله مش مسؤوليتك.
اتعلمي تقولي لا بهدوء ومن غير ما تبرري كتير. مش لازم تحكي قصة طويلة عشان ترفضي. “مش هقدر” كفاية، “مش مناسب ليا” كفاية.
جربيها مرة، هتحسي إنك أخف، وإنك رجعتي تملكي يومك من تاني. الحياة أقصر من إننا نعيشها بنعمل حاجات احنا مش عايزينها.