كتبت :حبيبه رافت.
مترو الخط الأول بيرجع جديد.. أول قطارين مكيفين يدخلوا الخدمة من المرج لحلوان
في خطوة مهمة لكل اللي بيركبوا مترو الخط الأول كل يوم، وزارة النقل أعلنت دخول أول قطارين جداد مكيفين الخدمة على خط حلوان – المرج الجديدة.
القطارين دول جزء من صفقة كبيرة مع شركة ألستوم الفرنسية، بتتضمن توريد 55 قطار جديد، بإجمالي 495 عربة مكيفة، كل قطار فيهم مكون من 9 عربات.
وزير النقل، الفريق كامل الوزير، ركب واحد من القطارين الجداد من محطة سراي القبة لحد محطة السادات، عشان يجرب بنفسه التجهيزات الجديدة.
ما هو الجديد داخل القطارات الجديدة؟
– تكييف حديث
– ممرات آمنة بين العربات، تقدر تتحرك جوه القطر بسهولة
– كاميرات مراقبة جوه القطر وفي كابينة السواق، ومتوصلة بمركز السيطرة
– شاشات LCD بتعرض المعلومات والإرشادات
– شاشات فوق الأبواب بتوضح المحطة الجاية
– أماكن مخصصة للكراسي المتحركة لذوي الهمم
– خرائط إلكترونية مضيئة بتوضح مسار الخط والمحطات
الوزارة قالت إن الخطة هتخلص بنهاية 2028:
– 6 قطارات هتوصل بنهاية 2026
– 15 قطار كمان بمنتصف 2027
– وباقي الـ 55 قطار هيوصلوا بنهاية 2028
وفي نفس الوقت، بيتم إعادة تأهيل 23 قطار قديم بالتعاون مع شركة إسبانية، وتحديث أنظمة الإشارات والاتصالات والسكة والكهرباء، وكمان تطوير ورشة طرة.
الوزارة أعلنت إنه بيتم طرح تنفيذ محطة الشيخ منصور الجديدة، اللي هتكون بين محطتي عزبة النخل والمرج الجديدة، عشان تخفف الزحمة وتخدم عدد أكبر من الركاب.
الخط الأول طوله 44 كيلومتر، وفيه 35 محطة، وبينقل حوالي مليون و100 ألف راكب كل يوم؛وهو أول خط مترو في أفريقيا والشرق الأوسط.
أخبار الجمهور نبض الشعب وقلب الحقيقة