الرئيسية / غير مصنف / بالعقل يا جماعة

بالعقل يا جماعة

السفيرة نبيلة مكرم وزيرة الهجرة اللي راحت قرية في محافظة الغربية واتفرش لها سجادة علشان تعدي من عليها على الترعة أو المصرف.. هي مالها علشان تتهاجم كم الهجوم ده على السوشيال ميديا؟.

حضرتك هاجمت وانتقدت الوزيرة بكل حرية محدش قالك حاجة، اسمح لي أرد عليك بالمنطق والحجة وبهدوء بعيدا عن التعصب الأعمى.

نبيلة مكرم وزيرة راحت قرية وقَعَدت مع ناسها البسيطة وزارت مكان مفيش مسئول بيزوره من أول رئيس الوحدة المحلية لرئيس المدينة للمحافظ لنواب البرلمان.

هل وزيرة الهجرة هي اللي فرشت السجادة لنفسها علشان تعدي من على الترعة أو المصرف؟ هل وزيرة الهجرة لمل عرفت إن فيه مصرف بالشكل ده قالت مش هعدي ولازم تجيبوا سجادة؟ هل وزيرة الهجرة مكنش ينفع تختار إنها تزور قرية تانية أحسن نظافة من القرية اللي اختارتها وصممت إنها تزور قرية مهمشة وبسيطة بالشكل ده؟ هل علشان نزلت للبسطاء في بيوتهم تعاقبها علشان مسئول حب يجود ولا يداري على إهماله وتقصيره بفرش سجادة يخبي بيها فشله؟ هل وزيرة الهجرة مضطرة تزور الأماكن دي وهي صميم شغلها المصريين في الخارج.. دول أوروبية وأماكن فخمة نقوم نعاقبها وندبحها علشان نزلت لأهلي وأهلك في أماكن بسيطة محدش بيفكر يزورهم ولا يسمعهم؟.

أنا مش بشتغل مع وزيرة الهجرة ولا هي عندي على فيسبوك علشان تقرأ الكلام ده، أنا بديها حقها وبشكرها على مبادرتها بزيارة فئة من بسطاء كل حلمهم إن مسئول يزورهم مش وزيرة في الحكومة تقعد معاهم في العشش اللي عايشين فيها ومفيش مسئول محلي ولا نائب برلمان فكر فيهم، وإن كانت الوزيرة بادرت بزيارة البساط فمن الظلم إننا نحاسبها على أخطاء مسئولين كان أولى بيهم يصلحوا حال البسطاء بدل ما يداروا على خطاياهم بسجادة تخفي الواقع الأليم.

أرجوك احترم رأيي زي ما احترمت رأيك 🙏

شاهد أيضاً

” ابدأ مشروعك” دورة تدريبية بالنيل للإعلام بالمنوفية

كتبت : شروق أشرف عطا ختام فعاليات الحملة الإعلامية مستقبل ولادنا في منتج بلدنا والتي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *