أخبار الجمهور نبض الشعب وقلب الحقيقة
بقلم: رضوي سمان
مش كل الطعنات بتيجي من الغريب، لا، أحيانًا بتكون من القريب كمان؛ من أشخاص منحناهم الأمان، وشاركناهم أسرارنا، واعتقدنا إنهم آخر ناس ممكن يأذونا. ودي في حد ذاتها واحدة من أصعب صور الأذى؛ لأن الخيانة مش مجرد كذبة أو وعد ما اتنفذش، لكنها انهيار لعلاقة اتبنت في شهور أو سنين، وفي لحظة واحدة ممكن كل حاجة تتغير.
ممكن تلاقي الشخص اللي كنت شايفه كل حاجة في حياتك، بقى ولا حاجة بالنسبالك، مش بالضرورة لأنك كرهته، لكن لأنك تعبت من كتر الخذلان، وفقدت القدرة إنك تشوفه بنفس الصورة القديمة.
وليه ما نتكلمش عن أشكال الخيانة المختلفة؟ الخيانة مش علاقة عاطفية وبس، فيه خيانة صداقة، وخيانة عشرة، وخيانة مبادئ، وممكن تكون إفشاء سر ائتمنك عليه شخص، أو غدر وقت الشدة، أو التخلي عن إنسان كان شايف فيك الأمان.
وهنا بيظهر سؤال مهم: ليه الإنسان بيخون؟
هل الخيانة ضعف في الشخصية؟ ولا غياب للضمير؟ ولا قرار الإنسان بيختاره بإرادته؟
من وجهة نظري، الخيانة مش مجرد تصرف عابر أو خطأ غير مقصود، لكنها قرار بيتخذه الإنسان، حتى لو حاول يبرر لنفسه أسبابه. لأن اللي بيخون بيكون عارف إن فيه ثقة اتمنحت له، وإن فيه قلب ممكن يتأذى بسبب تصرفه.
لكن الأصعب من الخيانة نفسها هو تأثيرها على المشاعر؛ لأن جوا كل واحد فينا كلام كتير نفسه يقوله، وعتاب نفسه يخرجه، وأسئلة مستني لها إجابة، لكن أحيانًا بنعجز عن التعبير، فيتحول كل الكلام ده إلى خنقة وسكوت، ويصبح الصمت هو الطريقة الوحيدة للتعبير عن وجع مش قادرين نشرحه.
وفي وسط كل ده، هل معنى إن شخص خاننا إننا نقسى على كل الناس؟ طبعًا لا. مينفعش نحكم على الجميع من خلال موقف واحد، لكن المواقف بتعلمنا، ومرة بعد مرة بنتعلم إن الثقة لازم يكون ليها حدود، وإن مش كل شخص يستحق يعرف كل حاجة عننا.
ومن هنا نقدر نتأمل في المعنى الديني للوفاء والأمانة:
قال الله تعالى في القرآن الكريم:
﴿يَا أَيُّهَا الَّذِينَ آمَنُوا لَا تَخُونُوا اللَّهَ وَالرَّسُولَ وَتَخُونُوا أَمَانَاتِكُمْ وَأَنْتُمْ تَعْلَمُونَ﴾
[سورة الأنفال: الآية 27].
وجاء في الكتاب المقدس:
«الأمين في القليل أمين أيضًا في الكثير، والظالم في القليل ظالم أيضًا في الكثير».
[إنجيل لوقا 16: 10].
وفي النهاية، الخيانة مش مجرد فقدان شخص، لكنها درس بيغير نظرتنا للحياة وللناس. ممكن نسامح، وممكن نكمل، لكن مش شرط نرجع نمنح نفس الثقة مرة تانية.
لأن الوفاء مش مجرد كلام بيتقال، والأمانة مش وعود بتتقال وقت القرب؛ الوفاء الحقيقي بيظهر وقت الغياب، والأمانة بتبان لما تكون أسرار غيرك في إيدك.