جريدة الجمهور نبض الشعب وقلب الحقيقة
مقالات مشابهة
كتب: محمد سليمان
شخص شغله كله مع ناس ساكته مبتتحركش بس ديما في خوف منهم حتي لو مبيتحركوش تفتكر الناس الي شغاله معاهم مشافتش حاجه غريبه منهم ؟
تعالي احكيلك شويه عن مغسلين الاموات..
خلينا نقول في البدايه ان طبعا احنا عارفين أن أي مكان بيتواجد فيه الاموات بيبقي بشكل كبير في حاجه غلط، للاسف الموت هيفضل الحقيقه الوحيده في حياتنا وديما هتفضل مجهوله وزي ما قولنا وهنقول ديما لأن محدش رجع من الموت حكي حصل ايه، لكن الناس الي بتشتغل مع الاموات او معاصره الاموات بتشوف حاجات تستحق اننا نقف عندها شويه، فكره اصلا انك تدفن حد او تشرح حد أو تغسل حد مرعبه لبعض الناس وبعض الناس اتعودت عليها عادي جدا بس برضو جواهم منها رهبه، ومقالنا النهارده عن الناس الي واخدين وش القدره زي ما بيقولوا وهما اول ناس بتتعامل مع الميت الناس الي بتغسل، تفتكر الناس الي بتغسل الاموات دي مشافتش حاجه غريبه قبل كدا ؟
اصل دا بيتعامل مع ميتين الاموات اسرار ومبيكشفوش سرهم غير لحد هما الي بيختاروه بنفسهم، مقال النهارده تجميع شخصي و بنفسي من الناس الي حكت المواقف الي هنقرأها دلوقتي مع بعض، ناس بتغسل اموات قررت تحكي حاجات وحاجات تانيه رفضت تحكيها وحاجات تالته اتحكت بس رفضت اننا تتكتب في المقال وانا محترم دا جدا هما عارفين ايه الي يتحكي وايه الي مينفعش لان دي ياعزيزي القارئ حرمه ميت، مش هنقول اسماء لأنهم ناس معروفه وفي منهم شغال في أماكن معروفه ولا هنذكر عنهم اي معلومه احنا بس هنذكر الي اتقال، الي اتقال علي لسان مغسلين الاموات !
عم (ك) راجل شغال في احدي مشارح مصر المشهوره جدا جدا وهوا المسؤول عن غسل الاموات هناك، حكي وقال إنه شغال في الشغلانه دي بقاله عشرين سنه وياما عدي عليه حاجات وفي الحاجات الي ينفع تتقال وفي الحاجات الي ينفع متتقالش لان دي في الاول والاخر حرمه ميت، لكن من ضمن المواقف الي ينفع تتقال أنه في مره كان جايله ميت في حادثه وعلي حسب ما قال إنه كان كل حته فيه في حته والمطلوب منهم أنهم يجمعوه، طبعا بيتم تخييط الأشلاء مع بعض ويجتمع الجسم ويتم الغسل، معرفش هل كل المشارح بتعمل نفس الحاجه ولا لا، المهم كل حاجه تمت كالعاده بس الغسل اتاخر شويه لحد ما أهله ييجو الصبح ومفيش غسل بليل وحطو الميت في التلاجه ودا عادي جدا، الي مش عادي أن من وقت ما حط الجثه دي في التلاجه وزي ما تكون المشرحه اتقلبت، ريحه وحشه جدا قلبت المكان ودورو في كل حته ملهاش اي مصدر، افتكرو أن في تلاجه فصلت وحاجه عفنت ودي كارثه لكن لا كل حاجه سليمه، بعد شويه سمع صوت حد بيغني وحد بيغني بصوت حلو اوي كمان، الحاجات دي مش جديده عليه لأنه ياما سمع وياما شاف بس المرادي كل حاجه جت لما الراجل دا دخل المكان راح وفتح التلاجه بتاعته ومش عارف هوا بيعمل كدا ليه، لقي رجله محطوطه علي بعض و ايده محطوطه علي بعض في وضع غير الي سابه فيه خالص !!
استعاذ بالله من الشيطان وقفل باب التلاجه بس عارف لما تيجي تقرب مغناطيس من حاجه ويشدها مره واحده !؟
دا نفس الي حصل زي ما يكون حد شد منه باب التلاجه، اليوم التاني وهوا بيغسله قال أنا عمري ما كنت خايف كدا وانا بغسل حد في حياتي انا عندي شعور غريب أن الي تحت ايدي دا ممكن يتحرك في أي لحظه، مع أنه متقطع أساسا وكله متخيط بس كل الاحداث الغريبه الي جايه مع الجثه دي مش منطقيه، وزي ما يكون قلبه كان حاسس قال في ثانيه واحنا بنقفل الكفن فتح عينه لجزء من الثانيه وقفل تاني !!!
الجسم مفيهوش روح خلاص ازاي يفتح عينه ويقفلها تاني ؟!!
اتخض لانه كان حاسس ان في حاجه هتحصل وقفل الكفن وقال إن الغسل دا كان اصعب وقت مر عليه لأنه مكانش فاهم حاجه ولا عارف ليه كل دا بيحصل وازاي فتح عينه طب هوا بيتهيقله من الخوف ؟
وختم عم (ك) كلامه وقال إن الموت سر محدش هيعرفه غير لما يجربه وحتي لما يجربه مش هينفع يرجعلنا خلينا منستغربش ونتعايش عادي ….
الموقف دا لحد بيغسل اموات هوا و ابنه والي حصل أن في دجال مشهور جدا في القريه بتاعتهم والراجل دا مات ومحدش رضي يغسله ولا يدفنه لانهم كلهم خايفين من شره وعيال الدجال دا لفت بيه لدرجه انهم كانو هيرموه في القبر من غير غسل ولا حتي كفن ويمشو، لكن صاحب قصتنا سمع الموضوع لان القرى في الأرياف الكلمه فيها بتسمع في كل البيوت عادي، راح وقال أنا هغسل وربنا يجعله في ميزاننا بس للاسف مكانش يعرف أن دا اكتر يوم مش هينساه في حياته كلها، جابو ترابيزه الغسل من الجامع وقالو هنغسل في بيته، رفعو جسمه علي الترابيزه وطلب من ولاده الاتنين يناولوه مايه والحاجات الي هيطلبها بس، قال وانا بمشي المايه عليه انا حاسس المايه سخنه سخنه بشكل كبير لأن هوا بيستعمل مايه دافيه في الغسل لكن دي اسخن بكتير من العادي، حس أن في حاجه غريبه والموضوع مش هينتهي على خير بس كمل، وعلي حسب ما حكي طول ما هوا بيغسل باصص علي وشه مركز مع وشه بس وتعابير وشه وهوا ميت عارف لما تحس ان في حد نايم وهيصحي دلوقتي ؟؟!
نفس الفكره بظبط (في تفاصيل كتير قال منكتبهاش زي شكله كان ايه وحاجات حصلت في تفاصيل النظافه وخلافه)
المهم المفروض بيبقي في مسك وتطيب بعد الغسل بس المسك ملوش اي ريحه على جسمه !!
حرفيا كأنه محطش اي حاجه خالص شويه وحس أن الراجل جسمه اتخشب اتخشب وجمد علي بعضه مفيش من ثواني كان جسمه عادي ازاي اتخشب بالسرعه دي !!
قعد يقرأ قران جنب وودنه لكن الي محدش نهائي توقعه أن الراجل دا يخرج من ودنه ديدان !!
ازاي دا حتي متحللش ازاي دا يحصل اصلا ؟
قفلو الكفن علي كدا والمفروض خلاص هيحطوه في الخشبه ويشيلوه بس فكرك الموضوع سهل كدا ؟
الراجل جسمه مش عاوز يتحرك من علي ترابيزه الغسل حرفيا كأنه بقي وزنه سبعين طن !!
يمين شمال مفيش مش راضي يتحرك نهائي فقررو يرموه جوا التابوت من علي الترابيزه يعني يوقعو الترابيزه ويقع جوا التابوت، وفعلا حصل وحطوه في التابوت وقفلو الغطا بس برضو مش هتخلص علي كدا، الراجل قعد يحلف أن التابوت كان في حد بيرزع فيه من جوا لدرجه ان في مسامير فكت عن بعضها في خشب التابوت!!
كل الي كان عليهم فاكرين أنه صاحي مش ميت لكن فتحو الغطا بتاع التابوت لقو الراجل الديدان بقت مغطيه جزء كبير من الكفن !
المغسل قال اخدت ابني ومشيت من البيت ومليش دعوه يدفنوه ولا يحرقوه أنا غسلت ومليش دعوه ومشي وانتهت القصه لحد هنا، يمكن الموضوع تحسه خيالي من كتر الحاجات الغريبه الي فيه بس الحاجات المتعلقه بالموت للاسف هتفضل خياليه بالنسبالنا لأننا عمرنا ما هنعرفلها تفسير ولا منطق لحد ما كلنا نجربها ….
التجربه الاخيره لواحد شغال مغسل تبع جميعه خيريه بيغسلو لوجه الله، بس في يوم جاله مكالمه أن في حاله في المنطقه الفلانيه خد معاك حد وروح وقد كان راح لقي كل حاجه جاهزه، الناس جايبه الترابيزه وحاطين عليها الميت وجابو الكفن والمايه جاهزه وكل حاجه جاهزه بشكل غريب اوي ومش معتاد، استعان بالله وبدأ شغله وكل حاجه كانت ماشيه عادي جدا جدا لحد وقت لف الكفن لقي الكفن مقطوع منه حته قد 3 سم كدا، سأل القرايب قالو جايبينه كدا الراجل مشكش وقال يمكن عيب في القماش وكمل عادي، المشكله مش هنا خالص المشكله ان الميت نفسه فتح بوقه لواحده من غير حاجه !!
خليني اقولك ياعيزيزي القارئ دا غالبا مبيحصلش ولو حصل بيربطو الفك بقماشه ملفوفه علي الدماغ من فوق عشان بوقه ميفتحش لكن الغريب أن بوقه فتح لواحده وهوا بيتلف وكان مقفول طول مده الغسل،
المغسل قال لاحظت أن في سنتين شكلهم لسا مخلوع من قريب وشك أن يكون حد خلعها قبل ما هوا ييجي بس ع الأقل كان هيبقي في آثار دم علي الهدوم أو حاجه، بس رجع وقال ما يمكن كتم الدم ودماغه كانت بتودي وتجيب ونسي اطلاقا أن دا راجل كبير ممكن سنانه تقع عادي وكان مستغرب نفسه ليه دماغه تروح للتفكير دا اكتر من التفكير المنطقي، خلاص هيقفل وشه وقال الي عاوز يسلم عليه يدخل يسلم قبل ما نقفل خالص كله دخل سلم عليه وخرجو عادي بس كان عنده شك أن في حاجه غريبه بتحصل بس مفيش دليل مادي في ايده، بعد ما حطوه في التابوت المغسل لمح جرادل مايه الغسل مترمتش لا هيا مركونه ومليانه المايه مطرح غسله جنب الحمام ودي اغرب حاجه شافها لحد الان !!
اليوم عدي الراجل دا في دماغه أن العيله دي فيها حاجه مش طبيعيه والتجهيزات الي حصلت قبل ما هوا ييجي والكفن المقطوع والسنان المخلوعه ومايه الغسل المركونه علي جنب، لو هتسال طب إلي خد الحاجات دي هيعمل بيه ايه اقولك ياعزيزي القارئ، مايه الغسل اللتر منها بيتباع بمبلغ وقدره للدجالين والسحره، وكذالك سنان الميت الجديد وكذالك حته الكفن والشعر واي حاجه جايه من ميت جديد بتتباع بمبالغ محترمه او ممكن هما الي يعملو بيها السحر وميبيعوهاش عادي، المغسل صاحب تجربتنا روح بيته ونام عادي جدا بس صحي علي صوت نكش في الأرض حد بيخربش في الأرض، ولع الاباجوره وبص عشان يلاقي واحد متكفن واقف علي باب أوضته !!
تخيل الموقف انتا صاحي من النوم فجاه لقيت جسم متكفن ومتربط واقف قدامك واقف مبيتحركش حركه واحده حتي !!
لسا المغسل هيتخض الكفن الي واقف قدامه دا بدأ ينط علي الارض بسرعه جدا وجاي ناحيته وفجاه اختفي !!
الراجل مكانش فاهم حاجه ولا ايه الي بيحصل شغل قرآن وحاول ينام وفعلا نام بس لما نام حلم بنفس المشهد وهوا بيغسل بنفس كل حاجه بس الراجل الي كان بيغسله كان بيعيط وبيقوله سرقوني كلهم سرقوني وعمال يعيد ويزيد في الجمله يعيد ويزيد في الجمله لحد ما الراجل صحي مفزوع، المغسل بيقول أنه كان حاسس ان في حاجه غلط وفعلا الاحلام الي كانت بتجيله والي شافه اكدله أن في حاجه غلط بس هوا مكانش في ايده اي حاجه يعملها، الراجل دا فضل يطارده في أحلامه فتره كبيره لحد ما اختفي من حياته لواحده زي ما ظهر زي ما اختفي.. و الي اللقاء في مقال اخر
