جريدة الجمهور نبض الشعب وقلب الحقيقة
مقالات مشابهة
الحقيقه أنا الفتره دي بقيت مصدومه بإنتشار الأطفال علي السوشيال ميديا وظهورهم بشكل غير لائق .. اللي منهم بيرقص واللي الأب والأم بيستغلوا ظهورهم عشان زياده نسب المشاهده .. كفاااااايه بجد حراام عليكم اللي بتعملوه في أولادكم ده هتتحاسبوا عليه
.. لو انتو نسيتوا التربيه أنا هفكركم بيها .. دورك كأب انك تحاوط مراتك واولادك بالستر والأمان وانك تأسس الولد ازاي يكون راجل ..وتعرفهم المبادئ الصح اللي اهلك اتربوا عليها وان مافيش راجل بيرقص عشان شهره او فلوس ..والراجل لازم يكون يعرف دينه ويقرب من ربنا ومايعملش الغلط .. علم ابنك ازاي يكون قد المسؤليات وازاي يكون سندك لما تكبر .. شارك معاه الصح مش الغلط …استغلوا في المفيد مش في الهلس عشان تتشهر …
وانتي كأم مع اول طفل ليكي مطلوب منك الإحتواء والتأسيس والتوعيه .. ومطلوب منك لما طفلك يصرخ تفهميه وتاخديه في حضنك مش تديله الفون عشان تريحي دماغك او تشغلي اغاني تخلي الشياطين يتلموا حواليه وبردو عشان تريحي دماغك .. انتي كأم مطالب منك التربيه والمتابعه لطفلك وانك تسمعيه وتنصحيه دا حتي قالولك ان الأم مدرسه يعني قبل ماطفلك توديه حضانه او مدرسه يتعلم انتي المفروض تعلميه المبادئ والأخلاق وان يتشهر بذكائه واهدافه .. انا حقيقي بستغرب جداا من النوعيات دي
طيب انتو مش قد الخلفه ماتخلفوش يجماعه .. لانكم اول ناس بتشتكي من ولادهم بعد مايكبروا دا مش بيسمع الكلام دا الاغاني 24 ساعه بيسمعها دا تعبان نفسيآ دا مافيش حاجه صح بيعملها .. دا تايه دايمآ ودرجاته مش حلوة ..دا مش نافع في حاجة … هاينفع ازاي في حاجه بعد ماانتو دمرتوا حياه ولادكم تحت باند الشهره .. حتي خافوا عليهم من العين ..
كفايه ياجماعه ياريت تبدأو صفحه جديده مع ولادكم قربوا منهم . علموهم المبادئ والدين بيقول أي .. خليهم مميزين ومعروفين بالعلم النافع ..اتمني تكون رسالتي وصلت لكل اب وأم
بقلم : شروق مبروك
معدة برنامج 45 دقيقة مع أشرف عطا
