أخبار الجمهور نبض الشعب وقلب الحقيقة
بقلم: كارول امجد
في وقت بقى فيه كل حد بيحاول يثبت إنه “تمام”، وإن حياته perfect ومفيهاش مشاكل، بقت صورة البنت القوية عند ناس كتير هي البنت اللي ما بتعيطش، ما بتضعفش، ما بتتكسرش… وده أكبر غلط!
القوة الحقيقية مش إنك تخبي مشاعرك، ولا إنك تمثّلي إنك ما بتتأثريش. القوة مش في إن قلبك يبقى جامد… القوة إنك تقعي وتتعوري وتتكسّري، وترجعي تكمّلي تاني.
البنت القوية مش “Superwoman”… لأ، هي بنت عادية جدًا، عندها لحظات ضعف، بتعيط، بتتأثر، بتتعلق، وتوجع… بس ما بتسمحش للوجع يعطلها.
بتتكسّر يوم، وتقوم تاني يوم تبني نفسها من الأول… حتى لو بإيد واحدة.
القوية هي اللي عرفِت قيمتها بعد ما اتقلّلت.
هي اللي وقفت على رجليها بعد خيبة… وكمّلت.
هي اللي بتقفل باب وجع، وتفتح باب حياة جديدة.
هي اللي بتتعلم من غلطها، مش بتكره نفسها عليه.
عارفة فين القوة؟
في دمعة نزلت منك بالليل، وبعدها قلتي: “أنا هقوم تاني وهكمل”.
القوة إنك تحبي نفسك وتقبّلي عيوبك وتشتغلي على تطويرها، مش إنك تلبسي ماسك إنك perfect.
القوة إنك تقولّي “تعبانة” لما تكوني فعلاً مش قادرة… مش إنك تسكتي وتجوّاي كل حاجة.
وفي الآخر…
البنت القوية هي أساس نفسها وسلامها الداخلي.