أخبار الجمهور نبض الشعب وقلب الحقيقة
بقلم: كارول امجد
كان الحب بينهم مش علاقة… كان حياة كاملة.
كان بيصحّى على صوتها، وبيطمن لما تسمع ضحكتو، وكانت بتحس إن الدنيا بتقف شوية لما يبصّ لها.
الحب اللي يخوّف… اللي يخليكي تحسي إنك لقيتي نفسك في حد تاني غيرك.
بس في لحظة واحدة…
اللي كانوا بيقولوا عليها “تفاصيل صغيرة” بقت جروح كبيرة.
الكلام قلّ، والقلق زاد، واللي كانوا بيخافوا يزعلوا بعض… بقوا مش فارق معاهم لو اليوم عدى من غير ما يحسّوا ببعض.
الفراق ما بيجيش مرة واحدة،
بيجي على مهَل…
نظرة بتبعد، كلمة بتتسحب، حضن بيبرد، ولحظة كده تحسي فيها إن اللي قدامك بقى غريب، رغم إنه أكتر حد عرفِك.
وفي يوم…
مفيش سبب واضح، ولا دموع كتير… بس في إحساس واقع على القلب:
“إحنا خلاص مش زي الأول.”
ساعتها بتحاولي تمسكي في الحاجة اللي كانت بينكم…
بس تكتشفي إن الحب لو اتكسَر مابيرجعش زي زمان.
وإن في ناس بنحبها لحد آخر العمر… بس عمرهم ما بيرجعوا لحياتنا تاني.
الفراق وجَع…
مش عشان النهاية، لكن عشان كل اللي كان ممكن يكمل ومكمّلوش.
وجع إنك تشوفي ذكرياتكم بتتحوّل لصمت، وضحكتكم تتحوّل لسؤال:
ليه سايبين بعض؟
ومع الوقت،
بتفهمي إن في قصص اتكتبت عشان نعيشها…
مش عشان تكمل.
وإن بعض القلوب لما تنكسر…
ما بتدوّرش على بديل،
بتتعلم ترجع لنفسها.